NORDJYSKE Medier - 20. August 2009

Kalaallit Nunaanni suliassat ikioqatigiiffigineqarsinnaapput, taamma Arctic Group naliliivoq. Oqaaseq attaveqatigiinneq aallaavigineqassaaq inuussutissarsiortut Nordjyllandimeersut Kalaallit Nunaanneersullu ullumi siunissami Kalaallit Nunaanni Nordjyllandimilu inuussutissarsiutinik ingerlataqartut 150-it suleqatigiiffigineqarsinnaasut sammillugit isumasioqatigiissallutik naapinnissaanni. Ukiuni aggersuni aatsitassarsiornikkut ingerlataajumaartut pisariaqartitaasa ilaannik pilersuinissamut attaveqarnertaaq aaqqiissutissatut isigineqarpoq.

- Naak ullumikkut inuiaqatigiinnut kalaallinut pilersuinerup 65 procentia Jyllanip avannaamiut isumagigaluaraat – tamannalu Kalaallit Nunaannut Nordjyllandimullu pingaarutilerujussuugaluartoq – ukiuni aggersuni ineriartornerup nassatariumaarpaa pilersaaruteqartarumaarmat immikkuutaarluta tamatsinnit imaaliinnarlugu naammasiumitaatsittarumaakatsinnik. Taamaattumik tassunga atatillugu ataqatigiissaarnissaq tulluarluinnartussaavoq, Arctic Group-imi, Kalaallit Nunaanni niuernerup ilarujussuanik tigummisaqartumi administrerende direktør Peter Freiesleben oqarpoq.

- Uagut nammineq gumminiit nivattaassuarnut pilersuutigaagut, kisiannili pikkoriffigisarput tassaasinnaavoq Kalaallit Nunaanni Issittumilu pissutsinik ajornartoorfiugajuttunik ilisimasaqarluarnerput, Peter Freiesleben erseqqissaavoq, qanittukkummi inuussutissanik Tunup avannarpiaanut Citronenfjordimut ilisimasassarsiortunut nassitseqqammerami.

Immaqalumiuna nassiussuineq tassaasoq Arctic Group-ip iluaqutaaffigisinnaasaa, Gunnar Laursen suleqatigiit sanaartornermut pilersuisuanni, XL Byg Arctic Import-imi pisortaq, oqarpoq.

- Naak Kalaallit Nunaannut pinngortitap pikkunarluinnarfigisaanut anngunniarneq ukiunik 30-nik misilittagaqarfigigaluarlugu aammalu kalaallinik amerlaqisunik attavigisartagaqarpugut soorunami tassunga tunngatillugu suleqateqarluarsinaasatsinnik, Gunnar Laursen oqarpoq.

Peqatigitillugulu naliliivoq amerikkarmiut/canadamiut aatsitassarsiornikkut ingerlatsiviisa Kalaallit Nunaanni piiaanissamut akuersissutaateqalersimasut angisoorsuit ilaasa sapinngisamik ikinnerpaanik pilersuisoqarnissartik soqutigissagunaraat.

- Taamaattumik ataqatigiissaarnikkut pilersuutissanik amerlanerpaanik neqerooruteqarsinnaaneq iluaqutaasorujussuussaaq, Gunnar Laursen ingerlaqqilluni oqarpoq entreprenørselskabit tassaasariaqassasut suleqatigiinnerni taamaattuni qitiutinneqartussat.

Silarsuarmi nutaami aatsitassarsiorneq

Arctic Group nammineerluni aatsitassarsiorfiit qanillattornissaannut piareersaateqareerpoq, tamannami Jyllandip avannaani niuernikkut inuussutissarsiornermut takornartaasorujussuummat, aammalu ilaatigut martsimi Toronto-mi, Canadamiittumi, aatsitassarsiornikkut saqqummersitsinerujussuarmut peqataanikuugami. .

- Isumasioqatigiinnermik aaqqissuisuusoq, Arctic Business Network, kaffisoqatigiiffiinnaanngilaq. Uagummi nammineq kattuffitsinni sulisut ilaat eqqartorneqartumut tunngatillugu paasiniaanissamik suliaqartippagut aammalu kikkut peqatigalugit suleqatiginissaat naleqqunnersoq misissorlugu, Gunnar Laursen oqaluttuarpoq.

Erseqqissarpaa kalaallit ingerlatsiviisa ilaatinnissaat pingaaruteqarmat.
- Kalaallimmi firmaat amerlasuut eqqartorneqartumut tunngatillugu ujartorneqartunik immikkut ittunik pikkoriffeqarput. Uagullu inuiaqatigiinni kalaallinut ilaasugut aatsitassarsiornikkut ineriartornerup kalaallinittaaq peqataaffigineqarnissaata qularnaarnissaanut peqataarusuppugut. Tamatumunnga aningaasarpassuit atorniarneqarput, nunammi allat ingerlatsivii suliassat amerlanersaannik tigooraassagaluarpata uggornassagaluaqaaq, Gunnar Laursen oqarpoq.

Ingerlatiinnarlugulu ilannguppaa aatsitassarsiorneq tassaajumaarmat ukiorpassuarni ingerlasussatut isigineqartariaqartoq.

- Attaveqarfissat ataavartussat toqqammavigisariaqarpagut sulissutigalugillu taamaalilluta inuiaqatigiit kalaallit ineriartornerup piumasarisaasa ilaannut pikkorissarsinnaassammata, Gunnar Laursen isumaliutersorluni oqarpoq.