Ukioq manna siullermeersumik Sisimiuni Børne-Cup-eqarmat SAK-’ niviarsiarartaasa lilleputtit tamanna nuannarilluinnarpaat. Nutaanik XL-BYG Arctic Import-imeersunik atisalersimallutik unammeqattaarnissamut tallimanngornermiit 20. februarimiit ataasinngornermut 23. februarimut ingerlasussamut qilanaarput.

Angusat eqqarsaatigalugit niviarsiaqqat kingullerpaagaluarput, tamannali imatorsuaq nikallunngatiginngikkaat sungiusaasup Evelyn Frederiksenip oqaatigaa. - "Niviarsiaqqat lilleputtinut klubbinit allaneersunut unamminerminni misilittagaqarnerusunut unamminertik assut pissarsiffigaat" sungiusaasoq oqarpoq, nangipporlu aappaagumut niviarsiaqqat angusarissaanerunissamut piareersimasut.

Unammisaqattaartitsinerup Sisimiuni håndboldimik soqutigisaqarneq annertusisippaa. Niviarsiaqqat lilleputtit unammisaqattaarnerat qaammatit pingajuat qiteqqullugu matuma siornagut aallartimmat peqataasut tallimaannaagaluarput. Ataasinngormalli niviarsiaqqat 33-t håndboldimut sungiusariaqataajartorsimapput. SAK-p niviarsiarartaasa amerliartornerat malunnarpoq. Taakkualu piumassusileriujussuullutillu, nuannaarlutillu håndboldimut sungiusarnissamik soqutigisalerujussuullutik.

XL-BYG Arctic Import-imiit Salgschef Peter R. Bertelsen oqarpoq ingerlatsivik niviarsiaqqanik klubbip qalipaataanik qalipaatilinnik atisanik sungiusarnerminni aammalu unamminermi atugassaannik tapersersuinissaminut nangajallanngivilluni aalajangersimasoq. "Ukiuni arlaqaleqisuni Kalaallit Nunaanni meeqqanut inuusuttuaqqanullu tunngatillugu ingerlatassanik tapersersuisarpugut aammalu politikkeralugu tapersersuutit tamakkununnga tunniunneqartassasut." Niviarsiaqqat nuannaarnerat XL-BYG Arctic Import-imut tapersiinerup tulluartumik tuniunneqarsimaneranut uppernarsaataavoq, Peter R. Berthelsen oqarpoq. Niviarsiaqqat nuannaartorujussuupput Børne-Cup-imilu lilluputtinullu allanut unammisarnissartik qilanaaralugu.

Holdit taakkua aappaagu Sisimiuni Børne-Cup-eqarnissaani ukioq mannatut qungutsaaritsigiumaarnersut malittarinissa pissanganarpoq.